Skip to main content

Stýrðu nálunum

Arduino kemur í stað gamla stjórnborðsins

Í hnotskurn

  • Upprunalega stjórnborðinu er skipt út fyrir Arduino örtölvu með 12V spennubreyti, sem er beintengd við sleðann.
  • Örtölvan veit hvar sleðinn er og segir tölvunni hvort hann er kominn út fyrir mynstrið vinstra megin (L) eða hægra megin (R).
  • Tölvan svarar með næstu umferð mynstursins. Um hana er fjallað í Stýringin á tölvunni.

Hvernig virkaði þetta upprunalega?

Upprunalega vélin er með stjórnborð, svokallaða Form tölvu, sem tengist með DIN-6 snúru við sleðann. Í sleðanum er rafrás með ljósskynjurum sem skynja göt á brautinni sem sleðinn rennur eftir. Götin eru 2 mm breið og 3 mm eru á milli gata. Hver nál er 5 mm.

flowchart LR
  braut["Braut"] -. "ljós / skuggi" .-> skynjari["Ljósskynjari"]
  skynjari -- "5V: hár / lágur" --> sledi["Sleði / lás"]
  spenna["Spennubreytir"] -. "15V" .-> bord["Stjórnborð"]
  bord <-- "5V: hár / lágur" --> sledi
  bord -. "15V" .-> sledi
  sledi -. "15V: hár / lágur" .-> seglar["Seglar"]
  seglar -. "upp / niður" .-> nal["Nálastillir"]

Endurteiknað eftir kerfismyndinni Stýring sem stillir nálar prjónavélarinnar í skýrslunni.

DIN-6 tengið

Teikningar fyrir tenginguna í gegnum DIN tengið eru fengnar af vefsíðu Backspace hakkarasmiðjunnar í Bamberg (Backspace, e.d.).

  • Pinnar 2 og 4 taka við straumi frá ljósskynjurum sleðans.
  • Pinnar 5 og 6 stýra stöðu seglanna tveggja. Einn segull er fyrir hvora átt.
  • Til að snúa seglunum við þarf að minnsta kosti 12V straum. Pinnarnir senda merki um hvort straumnum sé hleypt á seglana eða ekki.

Sleðinn stillir mynstur fyrir næstu umferð á meðan hann fer yfir nálabeðið og prjónar mynstrið sem þegar er á nálabeðinu.

Teikning af rafrás með merkingum GRND, VIN, D2, D4, D5, D6 og DIN 6

Rafrásin sem tengir Arduino við DIN-6 tengið (PASSAPCONTROL.png í skýrslugeymslunni).
AthugasemdUm myndina

Þessi teikning fylgir skýrslugeymslunni en það er ekki vísað í hana í texta skýrslunnar. Merkingarnar á henni (GRND, VIN, D2, D4, D5, D6, DIN 6) eru það eina sem við vitum um hana.

Arduino örtölva með vírum tengd við prjónavél

Arduino örtölva tengd við DIN-6 tengi á Passap E6000. Ljósmynd: mbl.is/Kristinn Magnússon, úr umfjöllun Morgunblaðsins (Guðmundsdóttir, 2024).

Í hvora átt fer sleðinn?

Í hvert skipti sem staðan á ljósskynjaranum sem er tengdur í pinna 2 á Arduino borðinu breytist, fer í gang truflun (e. interrupt) sem skoðar strax stöðuna á hinum skynjaranum. Tvennt getur gerst:

Aflestur skynjaranna Átt Teljari
Sama gildi Til hægri Hækkar um einn
Sitthvort gildið Til vinstri Lækkar um einn

Út frá þessum innri teljara veit örtölvan nákvæmlega hvar sleðinn er á nálabeðinu.

AðvörunMundu

Teljarinn er aðeins réttur ef sleðinn er tekinn út af nálabeðinu og settur aftur inn á í hvert skipti sem örtölvan er endurræst eða endurtengd.

Hvað gerir örtölvan?

Kóðinn á örtölvunni er skrifaður í C++. Hann geymir vigur af lengd 179, eitt gildi fyrir hverja nál. Tvær breytur til viðbótar halda utan um mynstrið: upphafspunktur og lengd mynsturs. Grunngildin eru -10 og 10.

Örtölvan sendir tvenns konar skilaboð yfir serial samskipti:

  • L þegar sleðinn er vinstra megin við upphafspunktinn, það er teljarinn er lægri en upphafspunkturinn.
  • R þegar sleðinn er hægra megin við mynstrið, það er teljarinn er hærri en upphafspunkturinn að viðbættri lengd mynstursins.

Þegar engin truflun er í gangi athugar örtölvan hvort skilaboð hafi borist yfir serial tengið. Strengur með fleiri en 3 stök er lesinn sem mynsturstrengur. Styttri strengir eru skipanir, sjá Stýrðu mótornum.

Mynsturstrengurinn

Strengurinn byrjar á formerki, plús eða mínus. Næst koma tveir tölustafir frá 01 upp í 90. Loks kemur mynstrið fyrir næstu umferð. Dæmið í skýrslunni er svona:

- 0 5 0 0 1 1 0 0 1

  • Formerkið segir hvoru megin við miðju nálabeðsins mynstrið byrjar.
  • Upphafspunkturinn er númer nálarinnar sem mynstrið byrjar á.
  • Mynstrið er alltaf skrifað frá vinstri til hægri. Strengurinn hefur núll fyrir hverja nál sem á að prjóna lykkju.

Af Instagram

Myndir og myndbönd sem teymið birti á Instagram meðan á verkefninu stóð. Öll myndböndin eru líka í spilunarlistanum HiDEF textiles á YouTube.

Arduino örstýring lóðuð við DIN-tengi E6000 vélarinnar kveikir og slekkur á seglunum í fremra lásaborðinu. Færslan á Instagram, 29. maí 2024.
Björninn: harðkóðaður vigur segir seglunum hvort næstu nálar fari í vinnu- eða hvíldarstöðu. Færslan á Instagram, 31. maí 2024.

Elías Lúðvíksson. Úr lokaskýrslu verkefnisins (Lúðvíksson o.fl., 2024); kóði í passAPI (HiDef Textiles, 2024). Teikningar af DIN-6 tengingunni frá Backspace í Bamberg (Backspace, e.d.).

Heimildir

Backspace. (e.d.). Passap pfaff e6000. Sótt https://www.hackerspace-bamberg.de/Passap_pfaff_e6000
Guðmundsdóttir, V. L. (2024). Sjálfvirknivædd prjónavél í bígerð. Morgunblaðið. https://www.mbl.is/frettir/innlent/2024/06/02/sjalfvirknivaedd_prjonavel_i_bigerd/
HiDef Textiles. (2024). passAPI: stýring fyrir Passap E6000. GitHub. https://github.com/HiDefTextiles/passAPI
Lúðvíksson, E., Hilmarsdóttir, G. Í., og Ásgeirsdóttir, S. E. (2024). Lokaskýrsla: HiDef Textíll: Tæknivæddar prjónavélar [Lokaskýrsla til Nýsköpunarsjóðs námsmanna]. Háskóli Íslands. https://github.com/HiDefTextiles/NSN-2024